" تم تأجيل تسليم الproject الى بداية الاسبوع القادم بدلا من اليوم "
جملة قرأها محمد الدسوقي على سبورة 104 عند دخوله , فاستغفر ربه ثم مضى حيث كان يجلس احمد رفاعي في اخر صف من صفوف الفصل و الذي لاحظ توقف الدسوقي لثوان امام السبوره
- " خير جاي بدري النهاردة ؟ " سأل رفاعي
- اصل ابويا النهارده في البيت و هو اللي حيروح المستشفى مع الحاجة , انت ايه الكتاب اللي انت بتقرأه ده؟
- شيكاجو , ده انسب مكان تقرأه فيها
- ابويا جابها بس انا مش حاقرأها , مش ممكن الاقي 20 صفحة بتوصف في مشهد جنسي , بس مش ديه المشكلة دلوقتي
- امال ايه اللي حصل
- انت قريت اللي مكتوب على السبوره
- اكيد , مش فارقه يا دسوقي
- مش فارقه ازاي ؟
- اصل انا معملتوش , و بعدين ديه مش اول مره
- طب هو اتأجل المره ديه ليه ؟
- ماعرفش , باقولك بقرأ شيكاجو و بعدين عندك مندوب اسأله
اتجه الدسوقي بالفعل الى الصف الاول حيث يجلس سيد صلاح مندوب الدفعه و كان يتلو القران الكريم للاستفاده بوقته قبل بداية المحاضره , و لمن لا يعرف ماهية مندوب الدفعه فهو ببساطه همزة الوصل بين الطلبه من جهة و اعضاء هيئة التدريس من جهة اخرى , ينتخب الطلبه مندوب جديد مع بداية كل عام دراسي . مهام المندوب التقليدية تتمثل في استلام ال sheet من المعيد ليوزعه على الطلبه و يستلم الحلول من الطلبه و يذهب بها للمعيد , يخبر الطلبة بتغيير ميعاد تسليم الsheet او تغيير ميعاد المحاضرات , يضع جدول المعامل و مناقشة الطلبة لل projects بالتنسيق مع المعيد . بعض المندوبين قد يزيد من نفسه عن هذه المهام و لكنه لا ينقص منها ابدا مهما حدث . يعلم سيد صلاح هذه المهام جيدا فهذه هي ولايته الثانيه خلال 4 اعوام لذا فقد صار اكثر حنكة في التعامل مع طلبات الدفعه , يعلم متى ينقل الطلب للدكتور او للمعيد فورا و متى يناقشه و متى يتجاهله تماما
- السلام عليكم يا سيد
- و عليكم السلام يا محمد
- هو التسليم اتأجل ليه ؟
- اصل النور كان قاطع امبارح بالليل في فيكتوريا و فيه ناس معرفتش تشتغل و لا تخلص فطلبوا التأجيل و المعيد وافق
- طب انا اعمل ايه بعدما نمت 3 ساعات بس امبارح علشان اخلص
- " كويس , اديك مش حتشتغل فيه بعد النهارده " قالها صلاح مبتسما
- انت بتهرج , طب ما فيه ناس كده حتستفيد من التأجيل ده و حتتساوى بالباقي
كان الحديث قد بدأ يجذب كل من كان جالسا في الصف الاول و منهم عادل عبد الوهاب الذي كان ينظف فمه بالسواك
- " طب و انت حتخسر ايه لما هم يسلموا ال project كامل , كده الفائده حتعم على الجميع " قال عادل
- " و النبي !!! دلوقتي الفائده حتعم على الجميع و لما قلت نشتكي الدكتور اللي حط اعمال السنه من دماغه و خلاني انا الوحيد اللي جايب جيد جدا و الباقي جايب امتياز , كل واحد خاف على درجته " رد الدسوقي متعصبا كعادته كلما تذكر هذه الواقعة
- " لا تحلف بغير الله يا دسوقي" رد سيد صلاح
استشاط الدسوقي غضبا و علا صوته حتي بدا مسموعا للصاله كلها
" شوف انا باتكلم في ايه و هو بيتكلم في ايه , انتم فعلا دقون سوست , كل و احد مربيلي دقنه قد كده و عامل نفسه بتاع ربنا و لما حاجة تيجي ضد مصلحته ما يهموش لا دين و لا حاجه "
تعصب عادل عبد الوهاب لدينه و قام من مقعده كي يتشاجر مع الدسوقي و تبادلوا بالفعل اللكمات الخفيفه و هرع الاخرون و منهم احمد رفاعي كي يفضوا الشجار
0 comments:
Post a Comment